main bantwara kar aaya hoon
aadha sara kar aaya hoon
purkhe saare baant liye hain
aadhe aadhe chaant liye hain
dard, masaude, kisse, jhagde
peeth pe saare laad liye hain
ghar makaN aur main lamakaN
aangan bhi ik gaanth liye hai
rishto ne bhi bojh badhaye
choolhe ke tukde ho aaye
bair ko koi jala na paya
dil sabne apne sulgaaye
apne apne tukde tode
apne apne haath se khaaye
kulba dekhe aur muskaye
dheemeN dheemeN baat chalyae
"ye to ik din hona hi tha"
mana aakhir ye sab tai tha
phir bhi hai sawaal kya
nisbat baNt jaane se
gurbat bhi baNt jaayegi
hisse daari ho jaane
zimme daari ghat jaayegi ?
kagaz par jaise ameen
do aadhe tukde karta hai
kya barsoN ki ye zameen
do hisse ho jaayegi ?
aise kitne hi masle hain
beech kahin dil mein atke hain
baaki sab ka to
main niptara kar aaya hoon
main bantwara kar aaya hoon
bant jaaye go har kaudi par
ek hone ki ek wajah to bani rahegi
andar chahe sau hisse ye ghar ho jaaye
baahar iski parchaai par ek padegi
No comments:
Post a Comment