विदाई

.
..
ek dhalte hue sooraj ko vidai dekar
shaam ko ghar jo main phuncha
to apne bistar par
jism kuch pehle se halka paya
laga goya
dhalte hue sooraj ke saath dariya mein
jism ka pani bhi mila aaya hoon

zehan ka koi hissa
doobti kirno mein uljhkar
doob gaya hai shayad

kal tere aane ki khabar ho to
shayad
ugte sooraj ke saath dariya se
laut aaye badan mein rooh meri
..
.

कांच

!
ye duniya ek kaanch ka tukra
dikhe door man bhaye

man aaye to hath se pakruN
jhat ungli kat jaye

phir bhi aisi banwari
rooh rahi lalchaye

khoon bahe na pata chale
bas kaanch liye muskaye
!

दोहे

sookhi sookhi neend pe geeli geeli os
shab bhar chat par chand ne khoob kiya afsos

man birle bairaag ki kaisi pakri raah
jis se chahe chootna usko bhar le baanh

aankho se dam jaye hai, dil se jaye na peer
tera bandi banwara toh raha janzeer

maikhane ke dwaar pe rinda niru upaye
saugandh opar lalsa jee se hook uthaye

jisko jis se neh tha, usko wahi aazab
waaiz maikash ho gaya, hamse chuti sharab

जिन्दगी

zindagi aajkal tu kahan hai

tere bina thanda sa chulha hai
bada sust sa dhuaN hai

zindagi aajkal tu kahan hai

na daftar mein milti hai
na bistar pe hoti hai
virsa koi gham hai
seene pe dhoti hai

na bazaar o ghar mein
na shakh o shjar pe
na janiye kaun se kis bhanwar mein
kyonkar hui lapata hai

zindagi aajkal tu kahan hai

besabab khud se hi roothkar
kaun jata hai yun chootkar

ye be khyali hai, kya bachpana hai

zindagi aajkal tu kahan hai

ye kaisa ruaansaN jama hai
sar e chashm bikhre hain shikve
pas e jism uthta dhuan hai

go ki ai zindgai
mujhko aata nahin hai yakin
zindagi tu wahi hai wahi

jo kuch saal pehle kitni hasiN thi
nahin zindgai tu to aisi nahiN thi

apne sanche mein hi gal gayi kaise
tu itni badal gayi kasie

waqt se pehle hi pak gayi ho
chaal se apni jyon thak gayi ho

thahar sa gaya hai goya
tere chehre se hadsa beeta nahin hai
teri aankhoN mein
ab kuch bhi jeeta nahin hai

aaja aankhoN ke chumbak jila le
dard mein apne mujhko mila le
mujh se apna woh vada nibha le
ek din meri dyodhi pe aakar kabhi
mere saath ek mausam bita le

tujhse milna hai, tujhmein risna hai
phir tere sath shabhar bhatkna hai

pal bhar ki fursat mein har pal jalana hai

tere naam kai khat likhkar
bhool betha tha kone mein rakhkar
safha dar safha, har khat tujhe
padhkar sunana hai

baithkar tere kadmoN mein paiham
beete dino ka ye sab gham
tere aage bahana hai

tu bata tujhe kab aana hai

tu jo aana to aankhon ko dho lena
ab jo aana to jeebhar ke ro lena

mujhko daman apne chupa lena
mere kandhe pe sar rakh ke so lena

main ne barsoN ke kisse bichaye hueN hain
apni giriya ke ankur ugaye hueN hain

jeebh par ek dafa rakh kar dekhna
mere aahsooN zara chakh kar dekhna

bahut pheeke pheeke milenge
neem se ye bhi jeete milenge

aa in mein apni sansoN ka
batashoN sa sona mila de
apna bhoola sa chehra dikha de

waqt soona jo soya pada hai
dabe paon chupke se aakar
yak b yak ise chauka de

apni aahat se chaukhat saja de

barf ke tukde sa gal raha hai badan
aajkal tujhmein uljha hai mera sukhan

is dundhalke ki girah khol de
de ke ek gunguni si chuan

in andheroN mein noor ghol de

ye furkat ki bimariyaN hain
inki tu hi fakat ek dava hai
jaldi ye nabz aa thaam le
zindagi tu chahe jahaN hai!

एक और ग़ज़ल

daur e fardaN ke soche kya imroz kuch nahin bachta
jua hai zindagi aakhir ke isme kuch nahin bachta

hua acha jo tune hi pila di haath se apne
jo main sagar utha leta, kade mein kuch nahin bachta

ajab shai hai ye ulfat bhi, badi be aitbari hai
kisi ka kuch nahin jata, kisi pe kuch nahin bachta

kabhi aisa bhi ho mumkin, khuda ghar aaye mere bhi
use maloom pad jaye ki ghar mein kuch nahin bachta

shab e gham mein uljha dil, to dil ko bhool hi jao
ke kuch is tarah jalta hai, sahar tak kuch nahin bachta

unhone be wajah hikmat ki khanjar ke uthane ki
fakat woh muskara dete, to jaaN mein kuch nahin bachta

प्यास का बदन

ye dard ki zameeN hai
yahan ghoont bhoont rokar
ye jism hai ugaya
yahan humne pyaas bokar

har roz sochte hain
is saal baarishoN mein
shajar hara to hoga

har saal baarisheN par
ungaliyoN se riskar
beh jaati hain zameeN mein
au hum, sookhi ok bharkar
har saal sochte hain
shayad
agle saal baarishoN mein

har saal baarishoN mein
sab doob to hai jata
par kuch bheegta nahin hai
ye dard ki zameeN hai
galti hai garche par ye
kuch sokhti nahin hai

ye pyaas ka badan hai
kuch seenchta nahin hai

रूठ - सुलह

shahad sane us shahar ka saya
shaam ki khidki par phaila tha

barsaat ka pani utar chuka tha
par ab bhi gali ka tan geela tha

aise tum haath chura ke
gali mein apne kadam bacha ke
chit put boondon se badan bhiga ke
chale gaye,
darwaze pe gaaj gira ke

tum na thahre, shaam na thahri
peeche pahunchi thi shab gahri

par tere khyaalon ki be hoshi
neend se pehle let chuki thi

sirhane par diye ki lau machal rahi thi
thoda thoda jala hua mein
thodi thodi hawa jali si
aur adhjala sa woh lamha
jiski saansein khidki par hi subak rahi thi

kamre ka rang bhi jaise utra utra
aur galiyare mein ek chup si pasar gayi thi

tab band kitabon ke panno se
kagaz si haseeN woh teri
hasti si tasveer nikali

usi mein jaise simat gaya sab

soch raha tha shayad tum phir
khwab ka jadoo tod gayi ho

phir upar dekha chand laga tum
kaan ka boonda chod gayi ho

phir soch na paya kya kya sochoon
aisa ya phir waisa sochoon
ankhein shayad band hui par
main to shab bhar soch raha tha

.
.
.

subah achanak hili jo palkein
ujli ujli dhoop daud kar
lipat gayi seedhe seene se

ek thithakti zulf hawa ki
kano ki golaiyon mein machal gayi au

aur dheere se utar ke peeche
badan pe mere pasar gayi yun

jaise koi tamanna bandhe
ek sard si ungli mere kandhe se phisal rahi ho

aur na jane kahaN kahaN tak choo aai woh

teri neechi nazar samne
mujhe pata tha tum aooge
maine dil se bol diya tha
mujhe yakiN tha tum aaoge

aage to kundi sarkake chale gaye the
sone se pahle maine
ghar ka baaki har darwaza khol diya tha

दरिया मुझ में उग आया है

kai dino se kano mein
sannatta hi sannatta hai
goonj raha hai

kai dino se jee
tujh par hi jhuka hua hai
kai dino se tu ankhon mein
ghoom raha hai

teri parchai in aankhon mein
bheeg rahi hai
kai dino se teri dhoop mein
sookh raha hoon

dariya mujh mein ug aaya hai
main dariya mein doob raha hoon

katra katra bheeg raha hoon
purza purza tut raha hoon

kaai kaai jami hui hai
harkat sari thami hui hai

kyon aur kyonkar kasha-kashi hai
soch raha hoon, boojh raha hoon

kai purane jhoothon ko
sach man liya hai
kai purane sach hain
jinko bhool raha hoon

mere chere ka rang aaine se poocho
khud kya bolon, oob raha hoon

neend ke mano par ug aaye
aankhon mein rukti hi nahin

mehrabon se takrati hai
takra kar girti bhi nahin

chat lagti hai ab gir jaye
deewaron mein main
darwaza dhoondh raha hoon

ek guzaarish hai tujh se bas

jhilmil jhilmil reh .. gup na ho
kuch sun kuch keh .. chup na ho

mera zayeka apne hothon par rehne de
main ek zamane mein
aakhir tera mehboob raha hoon

dariya mujh mein ug aaya hai
main dariya mein doob raha hoon

झगड़ा

lal sooraj duba ke dariya mein
sara pani gulal kar dala

shafaq ko chod diya ambar par
bure maazi ki tarah
la waris

sham kal kuch is berukhi se hui
rukhsat
jaise beech bahas se uthkar
cigratte bujha ke chal diya koi

हिंदी ग़ज़ल

piya tere lahori naina aisa jaal bunaye
na dekha janma nahin, jo dekhe but ho jaye

-----------------------------------------

piya teeri ankhiyon se bindhi chali aai main
moh mein guthi aisi khul nahin paii main

man to banaya tha ki tohe akulaaoongi
ankhiyaN jhookaii aage peeche pachtaii main

koi meri ankhiyon mein dekhe teri gandh to
deh pe sajaye phiruN piya teri jhaanii main

kanche wali ankhiyon mein os batori ri
raat kal galiyon mein bada boraii main

sookhe meethe mahue ki jhaans si bikhari
piya teri ankhiyon se aisa garmaii main

जिन्दगी भर का यही हासिल है
जिन्दगी एक दिन नहीं रहती

समंदर

तस्वीर

तुम्हारे बाद